自從我做咗gipsy跟意佬四圍流浪之後，久唔久到夜晚都有啲恐怖事發生。
試過一次我去咗金像獎頒獎典禮，明明喺紅地毯同秋生哥傾得好哋哋，突然有人攞張毯卷住我一腳忽我由太平山一路碌到落花園道咁款，快過坐纜車！好驚，驚到有一刻發現自己捲住張被喺床底。
琴晚又嚟，同意佬食完米線心情靚靚去商場停車場攞車，等緊佢撻車之際有兩個王俊棠同大傻咁忍樣嘅黑衣人衝埋嚟吒起我胳肋底然後拖我入𨋢，𨋢門一開，到咗一片綠色草地，一望無際兼一望就知人類都冇隻。頓然想回頭扮frd同大傻哥哥講不如做個朋友吖，點知後面嘅佢哋連人帶𨋢已經消失咗。我欲哭無淚，係咁大嗌，希望有人類可聽到我聲音嚟拯救我，嗌嗌吓終於有人嚟捉住我雙手，同我講：「你好嘈啊！」「Sorry...我又發惡夢嘈醒你...」
冇事，寶寶乖，再瞓過。1:15放lunch, 同幾個c9同事老友鬼鬼一齊去食日本菜，唔記得食咗啲乜只知全程笑到噴飯，咀角啲芝麻都未抹得切就9秒9趕影selfie, 趕住2:15狗衝返公司打卡。明明得4丁友，點知個個好似食闊面大咁點調位極都塞唔哂4塊面入個mon度!手機咔嚓一聲，眨眨眼睛，從窗簾透入房的陽光好刺眼。
就係咁，基本上我成晚瞓咗係等於冇瞓。於是理性話我知我要去揾佢哋，兩隻貓咪每日都會喺呢個世界上最美墓地之一度打躉，佢哋冇主人，不過管理員好識做到時到候會餵佢哋。
好喜歡坐喺佢哋隔離一齊擔天望地，或者係因為我感覺自己同佢哋一樣，尋覓緊一個能為自己融和嘅地方，等緊一個避風港，摸索緊一個無論打風落雨，去到天南地北，都可以喺google map㩒個”home”然後用同一抽鎖匙返去擁有自己屋企味嘅家。
雖然我仲未知我同意佬將來的家會喺邊，但呢一刻我真係好掛住香港。
Search